Obama le US Presidential Inauguration Day

Ni thum hnu ah US ramhun a tuan dingmi, Barack Obama nih Feb. 20 ni thawk in Pu Bush cu a rian a chan cang lai. US ramhun hlun, Abraham Lincoln nih ramhun a rak tuan lai ah a tuah bantuk in Obama zong nih Philidelphia khua in tlanglawng a cit i, Washington D.C ah a rak phan. Baltimore khua a phak ah minung thong 50 reng nih an rak hngah i biachimnak a ngei. Mah hnu ah Washington khuapi ah a lut.

Beltimore khua i Obama bia a chim lio

Tuchun ah Abraham Lincoln philhlonak lungphun an tuahnak ah hlasakthiam pawl nih zaisawmrel an tuah i, mah ka ah cun an chungkhar in an ra i, bia a chim. Minung million a cheu tluk an chuak. Washington D.C khuachungah khual le lai a phan dingmi hi minung million pahnih tluk an si lai tiah an zumh. Vawleicung khuazakip in ramhun pawl, vuancichuk pawl le ramdang vuanci pawl pin ah ram aiawh in palai tampi an phan lai ti a si.

Obama Inauguration ah caah US phaisa in miliion 150 renglo a dih lai ti a si. , George W. Bush chan (2005 ) i inauguration lio ah  $42.3 million a dih. Bill Clinton chan lio (1999) ah  $33 million an rak dih ti a si. Pu Bush nih Washington D.C khua chungah Emergency a chuah i, mipi hunhimnak caah million 15 a dih lai ti a si. Obama cu mizeimaw nih an thah sual lai ti phan ah secret service pawl nih special in ramhun a cuh thawk khan an congh cang. Tutan Obama Inauguration ah hin minung million 2 in million 3 an chual lai tiah an zumh.

Abraham Lincoln nih sal zuatnak phung a hrawh i, tuanbia a tial. Dr. Martin Luther King nih a luancia mi kum 50 tluk i a rak chim lengmang mi a chunmang ( I have a dream ) cu atu hi a tling cuahmah cang. Bawi le sal cabuai pakhat ah rawl an i hrawm lai timi cu atu hi a si. Pathian nih minung hi a tluk cio in a kan ser. Obama nih a chimmi ah,  "US ah hin a si kho lomi a um lo e" a ti. US ramhun a thim lio i, telnak bia a chim lio ah siseh, nizan i, Lincoln Memorial i bia a chim lio zongah siseh, a nolh than.

Obama nih US tuanbia lawng si loin vawlei tuanbia tial a timtu a si. Miphun tleidanak vanpang, minak le mirang thleidannak vanpang, mirun le misifak thleidannak vanpang a chimtu ding a si. Minak ca lawng ah a si lo, Asian ca zongah a si, Latinos ca zongah a si, ngaktah ca zongah a si, nuhmei, pahmei ca zongah a si, mi sifak ca zongah a si, Chin miphun ca zongah a si, vawleicung mi vialte ca zongah ah a si. "US ah a si kho  lomi a um lo" timi bia nih mi lungthin a hninh hringhren. Febuary 20 ni zinglei suimlam 8 in CNN nih Live in Obama Inauguration lio kha an piah lai i, a zuanmi poah nih rak zoh cio te u, kan pum in kan i tel khawh lo hmanh ah a lang in US tuabia tial caan ah tel khawh i zuam cio hna usih.(Ref: Lairamthang, Laiforum, January 19, 2009)