Kawl ralkap uknak tang ah Khrihfa bu hna cu an tuar peng rih ko. Yangon ah a um mi Khrihfa biakinn pahnih cu a hramhram in ram a um mi Kawl ralkap riantuantu hna nih an khar piak hna ti a si.
December thla 2008 chung lawng ah Rangon, Dagon Myotit ah aum mi khrihfa buhna a si mi Dagon Joshua Church, Evangelical Baptist Church le Karen Baptist Church hna cu ralkap uktu bawi hna nih pumh an senh ti hna lo, biakinn kutka an khar piak hna ti a si.
December 22, 2008 zan ah khan Dagon Joshua Khrihfabu pastor pa cu zan ah an luh hnawh i bia an hal. Cun an biakinn ah khawmhnak tuah ti lo ding in nawl an pek ta ti a si. Cu hlei ah Nargis thlichia hranlio ah mi harsa bawmhnak caah timi phaisa cu biakinn hmunhma cawknak ding caah le biak inn saknak ding caah na hman, cun Buddhists hna Khrihfa luhter ding caah na lem sawi hna tiah sual an phawt chap bei ti a si.
December 29, 2008 ni ah khan EBC biak inn cu YaYaKah pawl nih an khar piak hna ti a si rih. Zanlei suimilam 6pm hrawng ah YaYaKah le a dang tampi an ra i an khar ti a si. Biakinn ah pumhkhawhnak ding caah theihpinak catlap ralkap sin in raklak mi zong an zoh ter ko hna nain, an khar chih ko ti a si. A ruang zeizei chim lo in cu tin cun an khar ti a si.
Rangoon khua hmun dang dang ah a um mi inn ah tuah mi Khrihfa bu fa tete a dang dang hna zong an khar piak len hna tiah theih a si. (Ref: Chinland Guardian, 14 January, 2009, Van Biak Thang)
No comments:
Post a Comment