Turkey vanlawng Amsterdam ah a tla

Tu zing zinglei Europe caan 10:40am, wednesday 25.2009 hrawng ah khan Turkish Airlines Boeing 737-800, ( Airline 737 hi vawleicung ah vanlawng tha cem pawl hmanmi, cun vanlawng engine zawng a thar lawng te hmanmi minthang ngaingai an si) asimi cu Turkey khualipi Istanbul in a thawh i Netherland ram Amsterdam's Schiphol airport ah tum a timh lio ah accident a tawng. Mah hi zei ruangah a si ti hi tu tiangah fiang in theih khawh a si na lo in nikhua chiat ruang deuh puh a si. Zei caah tiah cun Europe chak lei cu a tu hi winter a lai fang pi a si i, ram tam deuh ah cun winter holiday neih cio a si. Mah vanlawng chungpi ah hin minung 130 reng lo an um . Turkish Transportation Minister Binali Yildirim le Vanzuanlawng lei pehtlai in chimnak nawl a neimi pawl nih an chimnak ah cun a hliammi cu an um nain a thi mi cu an um lo an ti nain, CNN-Turk nih cun minung pakhat a thi tak ko tiah fiang tein thawng an thanh. Cun, hmanthlatu pa pakhat nih cun, mi tampi plastic rangpi in an tuam hna i an hrilh leng ko hna ka hmuh chih ko tiah a chim ve.Vanzuanglawng lei pehtlai in chimnak nawl a nei mi nih a chimnak ah cun minung 20 a hliammi an si a ti. Sinain a dawnghnak thawngpang theihnak ah cun minung 9 an thi i tampi an i hliam khuai. Mah vanlawng pi hi a hramthawk a tlak ka ah hin, a hnu lei nih hin vawlei hi a phak hmasa ti a si. ref: CNN